Psalm 103
1.
Minn zeele, pries oet alle mach de HEARE
en gef Zinn Naam Den haejleg is de eare.
Priest Um, want Hee hef vùlle goods edoan.
Joa, Hee vergef oew‘ zeunde allemoale
en wil oe bàtter maakn van alle kwoale.
Oew leawn is oet et graf wier op estoan.
2.
De HEARE dut oe as nen koonek waandeln,
in trouwe leefde zal Hee met oe haandeln.
Hee maakt oew’ joonkhaejd as nen oarendsvloch.
Met vreandeleke oongn zut oonzen HEARE
de aorme leu en gef ze nieje eare
en maakt ze vriej as vuegel in de loch.
3.
Hee maakn bekeand an Mozes Zinn gedachen;
alns wat Hee dut an Israëls geslachen.
Hee is geneareg, leefdevol en good,
gedueldeg, rieke en boawn alns te priezen.
Hee zal neet aajt vedan de vinger wiezen,
oons neet doon oondergoan in Zinnen glood.
4.
De zuenden dee oons skoold en skaamte brachen;
Hee straft ze neet, want Hee hef goo gedachen.
Zee toch de heemel hooge boawn oons stoan:
zoo groot is Hee, goodguensteg as gin aander.
As t oosen wied van t wessen oet mekaander,
zoo vear hef Hee de zuenden vot edoan.
5.
Nen vaa den vuur zinn wichter waakt en kloar steet;
zoo is de HEARE vuur wee op Zinn weg geet.
Oet stof emaakt weet Hee wo klean viej zeent.
Zoo tear as grùs; ne bloome fien en fluureg
is t meanske, tot de weend um ongeduureg
vear vot blùs en iej niks mear van um veent.
6.
Rechtveardeg is de HEARE vuur geslachen.
Van keend tot keend gef Hee oons mood en krachen.
Vuur aajt en eeweg dut de HEARE good
an wee Zinn reegls eare wilt bewiezen
en doar an deankt; loat oons de heemel priezen.
Hee s Koonek, heel de weald vaalt Um te voot.
7.
Priest engeln, stoarke healden, dissen HEARE.
Iej trouwe knechte, geewt Um al de eare.
All’ heemelmachen, priest Um, Hee is good.
Priest Um vuur wat op disse weald Zin woark is,
in alle stea woer Hee regeart en stoark is.
Oe pries ik, HEARE, oet min deepst gemood.
Luisterversie
Volgt nog