1.
Iej warn, O HEARE, oonze vuurgeslachen
ne plaase umm t skuuln in duustre nachen.
Toew nog gin boargen warn geboorn oet steender,
gin weald emaakt was vuur de meanskenkeender,
was God, Den gin begin of eane hef
van eeweghaejd de God Den umm oons gef.
2.
In disse weald is alls wat leawt bedoarflek,
et meanske is oet stof emaakt en stoarflek.
Et leawn is kort, al ràkt de leu zik rieke;
vuur God is doezend joar nen dag gelieke.
Et geet vuurbiej, et doert nog gin nen dag;
et leawn is as ne waake in de nach.
3.
Iej speult ze vot, nen sloap den zoo vuurbiej is.
Et meanske is as grùs dàt smoarns nog niej is,
nog fris en gruen, t skùt fluureg in de heugte,
mer soawns is t of ebrùkn, vegoan van dreugte.
Oew helleghaejd vaalt op oons as de nach,
Oew grimmeghaejd hef groote skrik ebrach.
4.
Dr is gin zuende den Oew’ oongn neet zaggen
deep in oons hatte of in oonz’ gedachen.
Viej kùent gin dag Oew’ helleghaejd oontvluchen,
de joarn vleengt vot zoo‘s eenmoal deepe zuchen.
Want zeuwnteg joarn, neet lenger doert oons leawn;
ook tachenteg, a-j stoark zeent, doert mer eawn.
5.
Et meeste in dit leawn zeent slimme daage
van mùejte en vedreet en zwoare slaage.
Op disse weald kuemp al et leawn an n eane;
de tied is kort, de dood is noojt tevreane.
Wee doekt zik as de HEARE helleg wort,
wee maakt tr zik nog klean vuur dissen God.
6.
Kom in oons hatte al Oew’ wieshaejd flustern,
lear oons de daage teln en noar Oe lustern.
Kom toch wierumme, want Oewn knech is bange,
heb toch beklag met oons, woch neet te lange.
A-w wakker wort, maak oons van zorgen vriej;
et oole is vegàtn en alns wort niej!.
7.
Loat oons van bliejskop vùlle daage lachen,
geliek de daage dee oons mùejte brachen –
de joarn toew-w bukn monn oonder Oewe haane,
gin dag vuurbiej gung zoondr skoold en skaande.
Bewoar Oew’ knechte, maak et kromme rech
en loat ùer’ wichter waandeln in Oew lech.
8.
Kom tot oons oawer met Oew’ leefde, HEARE,
joa kom toch daale, weas oons toch geneareg.
Et woark van oonze haane, heel oons haandeln,
opniej op weg goan, met de HEARE waandeln;
maak dàt toch vaste, doo oons goan in vrea,
loat al oons woark in Oe toch vaste wean.